ISANG team mula sa Northern Samar ang lumahok sa PROPAK Asia 2024 sa Bangkok, Thailand, na pinakamalaking trade fair para sa process and packaging technology sa Asya.
Ito ay bilang bahagi ng hakbang ng lokal na pamahalaan para mapagbuti ang output ng small and medium enterprises sa lalawigan.
Inihayag ng Northern Samar Provincial Economic Development and Investment Promotions Office (PEDIPO) na ang pagsali ng provincial government sa naturang event ay isang mahalagang oportunidad para sa local producers upang mapaghusay ang kanilang kapabilidad, mapalawak ang kanilang networks, at manatiling nakatutok sa pinakabagong development sa processing and packaging technologies.
Kabilang sa mga pangunahing produkto ng Northern Samar ay coconut-based food products, handicrafts, bags, tablea, taro chips, buko pie, pili nuts, atsara, camote candy, at processed aquatic products.
