KABUUANG 5,840 na mahihirap na pamilya sa Eastern Visayas ang lumahok sa programa ng Department of Social Welfare and Development (DSWD) para mapagaan ang epekto ng Food Insecurity at kakapusan ng tubig ngayong taon.
Ayon sa DSWD Eastern Visayas, saklaw ng Project LAWA (Local Adaptation to Water Access) at BINHI (Breaking Insufficiency through Nutritious Harvest for the Impoverished) ang dalawampung bayan sa apat na lalawigan sa rehiyon.
Nagsasagawa ang DSWD ng comprehensive training na kinabibilangan ng Disaster Risk Reduction, Climate Change Adaptation, rehabilitasyon ng water systems, communal gardening, vermicomposting, at hydroponics.
Kabilang sa mga sakop na lugar ang Almagro, Matuguinao, Sta. Margarita, Catbalogan City, at San Jose de Buan sa Samar province; Catubig, Gamay, Lapinig, Silvino Lubos, at Lope de Vega sa Northern Samar; Oras, Dolores, Jipapad, San Policarpo, at Maslog sa Eastern Samar; at San Ricardo, Bontoc, Silago, Sogod, at Libagon sa Southern Leyte.
