Pumanaw sa edad na 36 si Prince Al-Waleed bin Khalid bin Talal Al Saud, na kilala sa buong mundo bilang “Sleeping Prince,” matapos ang halos dalawang dekadang pagkaka-coma bunga ng isang malubhang aksidente noong 2005.
Si Prince Al-Waleed ay panganay na anak nina Prince Khalid bin Talal Al Saud at Princess Reema. Apo siya ni Prince Talal bin Abdulaziz at apo sa tuhod ni Haring Abdulaziz, ang nagtatag ng makabagong Saudi Arabia.
Noong 2005, habang nag-aaral sa isang military academy sa London, naaksidente siya at nagtamo ng matinding pinsala sa utak at pagdurugo sa loob ng katawan. Dahil dito, isinugod siya sa King Abdulaziz Medical City sa Riyadh kung saan siya nanatiling naka-coma ng dalawampung taon.
Sa kabila ng payo ng mga doktor na ihinto ang life support, buong tapang at pananampalataya na ipinaglaban ng kanyang ama na ipagpatuloy ang gamutan, umaasang magaganap ang himala. Ilang beses ding umani ng pansin ang prinsipe sa social media nang magpakita ito ng bahagyang paggalaw ng daliri o kamay, pero hindi ito tuluyang nagising.
Kahapon, July 19, 2025, tuluyan nang namaalam ang prinsipe. Ipinahayag ng kanyang ama ang pagpanaw nito sa pamamagitan ng social media at humiling ng panalangin para sa kanyang anak.
Ngayong araw, isasagawa ang funeral prayers kay Prince Al-Waleed sa Imam Turki bin Abdullah Mosque sa Riyadh, na dadaluhan ng pamilya, kaanak at mga tagasuporta.
Nagpaabot ng pakikiramay ang maraming netizen mula iba’t ibang panig ng mundo, habang muling nag-trending ang hashtag na #SleepingPrince bilang pag-alala sa prinsipe na naging simbolo ng pag-asa at pananampalataya ng marami.
