Isinuko ng social media influencer na Cherry White sa Land Transportation Office ang kaniyaNg driver’s license kasabay ng pagdalo niya sa pagdinig sa kasong reckless driving.
Kaugnay ito ng viral video ng vlogger na makikitang nagmamaneho siya ng nakataas ang paa at pasayaw-sayaw pa.
Ayon kay Acting Assistant Secretary at LTO Chief, Atty. Greg Pua, Jr. inamin ng vlogger ang pagkakamali, humingi ng paumanhin at tiniyak ang kooperasyon sa LTO Intelligence and Investigation Division.
Ipinaliwanag din ng vlogger na nangyari ang insidente tatlong buwan na ang nakararaan na kaniyang ibinahagi sa kaniyang Instagram account, gayunman, nag-viral ito nang i-post ng isang netizen.
Inatasan ng LTO si Cherry White na magsumite ng dokumento ng sasakyang gamit niya sa viral video sa susunod na pagharap niya sa ahensya.
