Kauna-unahang humanoid robot ng China, nakapag-enroll na sa PhD sa Drama at Film

Isang makasaysayang hakbang ang isinagawa ng China matapos tanggapin ng Shanghai Theatre Academy ang isang humanoid robot na pinangalanang Xueba 01 bilang opisyal na estudyante ng kanilang PhD program for Drama and Film. Ang robot na ito, na may taas na halos 1.75 metro at tinatayang may bigat na 30 kilo, ay nilikha upang maging bahagi ng isang experiment na binibuo ng sining at artificial intelligence (AI).

Sa tulong ng mga engineers mula sa University of Shanghai for Science and Technology at ng isang robotics firm, binuo si Xueba 01 na may kakayahang magsalita ng Mandarin, magpakita ng emosyon sa pamamagitan ng facial expressions, at makipag-ugnayan sa mga tao sa paraang halos hindi mo mapapansin na hindi siya tunay na tao. Hindi lang siya basta-basta robot — mayroon siyang sariling student ID, class schedule, at mismong adviser na kilalang direktor ng entablado.

Inaasahan na si Xueba ay sasailalim sa apat na taong doctoral program kung saan aaralin niya ang mga tradisyunal na porma ng Chinese opera, kabilang ang pagsulat ng script, pagganap sa entablado, at pagbibigay-kahulugan sa emosyon gamit ang galaw ng katawan. Isa sa mga layunin ng proyekto ay tuklasin kung hanggang saan kayang unawain at ipahayag ng isang makina ang damdamin, sining, at malikhaing ekspresyon ng tao.

Sa isang rehearsal, ginaya ni Xueba ang isang kilalang galaw mula sa tradisyunal na opera na kilala bilang “orchid fingers,” at ikinamangha ito ng mga nakapanood — hindi lamang dahil sa pagiging tumpak ng kilos, kundi dahil tila may sining ang kanyang paggalaw.

Hindi naman naiwasan ang mga pagtutol at tanong mula sa publiko. Marami ang humanga sa makabagong hakbang na ito, ngunit may ilan ding nagtanong: Paano makakaunawa ng emosyon ang isang robot? At karapat-dapat ba itong tumanggap ng parehong oportunidad tulad ng mga tunay na estudyante, lalo na kung may mga human PhD candidates na kapos sa suporta?