MULING binuhay ni Agriculture Secretary Francisco P. Tiu Laurel Jr. Ang Inter-Agency Livestock Data Analytics Group (LDAG) para mas maisaayos ang kakayahan ng kagawaran sa pagbabantay sa meat at poultry sectors.
Nilagdaan ng kalihim ang Special Order 599 upang muling paganahin ang LDAG para matiyak na stable ang presyo at suplay ng karne sa mga pamilihan kasabay ng pagbibigay proteksyon sa mga producer at consumer.
Itinalaga si DA Undersecretary for Livestock Dante Palabrica bilang chairman ng LDAG na ang pangunahing gagampanan ay ayusin ang collection, analysis, at reporting ng key livestock at poultry data.
Makikipag-ugnayan ang LDAG sa Philippine Statistics Authority (PSA) para sa data requirements.
Inaatasan din ang LDAG na magsumite ng regular na report sa kalihim ng DA kaugnay sa mga pangunahing kaganapan sa pork, chicken, egg, at dairy sectors.
