Ipinasara ng Department of Migrant Workers (DMW) ang opisina ng Reiven Air Travel & Tours Consultancy OPC (Reiven), at ang kasabwat nitong recruitment agency na Reliable Recruitment Corporation (Reliable) sa Ermita, Maynila dahil sa kanilang pagkakasangkot sa illegal recruitment.
Batay sa imbestigasyon ng DMW, nagsasagawa ang Reiven ng recruitment activities sa loob mismo ng opisina ng Reliable, kabilang ang orientation para sa mga aplikanteng inaalok nila ng mga trabahong fruit picker, farmer, truck driver, at welder patungong Poland.
Ipinapangako ng dalawang kumpanya ang sahod na humigit-kumulang P90,000 at sinisingil ang mga aplikante ng halagang P70,000 bilang processing fee.
Sinabi ng DMW na nilabag ng Reiven ang itinakdang batas sa ilalim ng Republic Act No. 10022, na mahigpit na nagbabawal sa mga travel agencies na magsagawa ng anumang recruitment activities.
Mahaharap sa kasong illegal recruitment ang mga opisyal ng Reiven at Reliable, at isasama sila sa listahan ng mga mayroong Derogatory Record ng DMW.
