Binawian ng buhay ang 6 na magkakapamilya sa karambola ng 3 sasakyan sa Maharlika Highway sa Lopez, Quezon nitong Miyerkules ng madaling-araw.
Kabilang sa mga nasawi ang 2 menor de edad habang 3 ang sugatan sa aksidente.
Ayon sa report ng Lopez police, kabilang sa sangkot na sasakyan ang isang three-wheeled motorcycle o toktok, isang cargo truck at isang pampasaherong bus.
Lumalabas sa imbestigasyon na patungo sa Libon, Albay ang toktok tricycle na may 9 na sakay at nakahinto sa ginagawang bahagi ng highway nang tumama sa likod nito ang kasunod na truck pasado alas-2 ng madaling-araw.
Sa lakas ng pagsalpok, naitulak ang toktok patungo sa kabilang lane, kung saan ito bumangga sa kasalubong na bus.
Nagresulta ito sa pagkasunog ng toktok. Kasamang natupok ang 4 na sakay nito, kabilang ang 2 lalaking menor de edad na idineklarang dead on the spot.
Nadamay sa pagkasunog ang bus, samantalang nahulog naman sa kanal sa gilid ng highway ang truck.
Napag-alaman na may baon na gasolina ang driver ng toktok, na siyang pinagmulan ng sunog.
