NAKAHUKAY ang militar ng isang rifle at magazines na pag-aari ng New People’s Army (NPA) sa bulubunduking bahagi ng Old Union Village sa Sta. Rita, Samar.
Ayon kay Lt. Col. Eduardo Meclat Jr., Commander ng 63rd Infantry Battalion, nadiskubre ng mga sundalo ang bushmaster 5.56mm rifle at tatlong empty magazines, batay sa impormasyon mula sa mga residente.
Sinabi ni Meclat na ang pagkakadiskubre sa armas ay patunay na mahalaga ang pagtutulungan sa pagitan ng militar at lokal na komunidad upang matiyak ang kaligtasan.
Pinasalamatan naman ni Brig. Gen. Noel Vestuir, Commander ng 802nd Infantry Brigade ang mga residente sa kanilang kooperasyon at pagmamalasakit sa kanilang komunidad.
