SAMPUNG milyong pisong pabuya ang alok sa sinumang makapagbibigay ng anumang impormasyon para sa ikadarakip ni Pastor Apollo Quiboloy.
Ito ang inanunsyo ni Interior and Local Government Secretary Benhur Abalos, kasabay ng pagsasabing mayroong mga kaibigan na nais tumulong sa paghahanap sa kontrobersyal na Pastor at nag-alok ng malaking halaga.
Sa press conference, inihayag ni Abalos na bukod kay Quiboloy, may alok ding tig-isang milyong pisong reward para sa makapagtuturo sa lima pang co-accused ng leader ng Kingdom of Jesus Christ
Inilabas ang arrest warrants laban kay Quiboloy at sa limang iba pa, dahil sa umano’y paglabag sa Republic Act 7610 o Special Protection of Children Against Abuse, Exploitation, at Discrimination Act at Republic Act no. 9208 o Qualified Human Trafficking.
