Argumento sa pagpapasubpoena sa bank at tax records ni VP Sara, inilatag na ng prosecution at defense teams

INILATAG na ng prosecution at defense teams ang kani-kanilang argumento kaugnay sa pagpapasubpoena ng bank at tax records ni Vice President Sara Duterte upang magamit sa pagtalakay sa Article 2 ng impeachment case na may kinalaman sa unexplained wealth.

Si Akbayan Partylist Rep. Chel Diokno ang kumatawan sa prosekusyon upang ilatag ang kanilang argumento habang si Atty. Michael Wesley Poa sa panig naman ng depensa. 

Iginiit ni Diokno na mailalabas ang katotohanan sa alegasyon kaugnay sa unexplained wealth ng Bise Presidente kung mabubusisi ang bank, BIR at AMLC records nito at ng kanyang asawa. 

Binigyang-diin ng kongresista na nakasaad sa Konstitusyon na may extraordinary powers ang impeachment court kaya’t kontra ito sa pahayag ni Poa na walang awtoridad ang korte na i-scrutinize ang records. 

Kinontra rin ng prosekusyon ang pahayag ng depensa na irrelevant ang financial records ni VP Sara dahil batay sa AMLC report, ang pagkakaroon ng hindi maipaliwanag na yaman ng bise presidente ay mahalaga para sa isyu ng betrayal of public trust.