Pamahalaan, pinalawig ang Libreng Shuttle Service para sa pagbubukas ng klase sa gitna ng krisis sa San Juanico Bridge

PINALAWIG ng mga ahensya ng pamahalaan ang kanilang Libreng Shuttle Service, bilang tugon sa kinakailangang transportasyon ng mga estudyante tumatawid sa San Juanico Bridge para sa pagbubukas ng klase.

Batay sa obserbasyon sa nagdaang school year, sinabi ng Department of Education (DepEd) na daan-daang mga estudyante mula sa mga barangay sa Sta. Rita, Samar ang naglalakad sa kahabaan ng tulay para makapasok sa mga paaralan sa hilagang bahagi ng Tacloban City.

Sinabi ni DepEd Eastern Visayas Regional Director Ronel Al Firmo na ang kanilang hiling sa Shuttle Service Providers ay bigyang prayoridad ang mga mag-aaral para sa libreng sakay, lalo sa tuwing rush hours sa umaga at hapon.