KINONTRA ni Suspended Bamban, Tarlac Mayor Alice Guo ang panibagong alegasyon sa kanya ni Senador Sherwin Gatchalian na posibleng siya si “Guo Hua Ping” na isang Chinese.
Sa kanyang statement na ipinadala sa senado, iginiit ni Guo na hindi niya alam o wala siyang kinalaman sa mga dokumentong ipinakita ni Gatchalian na mula sa Board of Investments at Bureau of Immigration.
Nanindigan ang suspendidong alkalde na ang kanyang tunay na ina ay si Amelia Leal at ang kanyang totoong pangalan ay Alice Leal Guo, batay sa kanyang birth certificate.
Binigyang-diin pa ng suspended mayor na mayroon siyang Philippine Passport na inisyu ng DFA at kumukuha rin siya ng Chinese Visa tuwing magtutungo sa China.
Mayroon din anya siyang mga negosyo, personal properties, at lupa sa Pilipinas at nagbabayad ng buwis.
Iginiit pa ni Guo na nanalo siya bilang alkalde dahil siya ay isang lehitimong residente ng Bamban, Tarlac.
