PATAY an usa nga miyembro san Magbutay Criminal Gang nga nag-ooperate sa Calbayog City kahuman makipag-pusilay sa mga otoridad huwebes san udto sa nasabi nga ciudad.
An panhitabo in kasunod san entrapment operation san mga kapulisan sa suspek nga guin kilala sa ngaran nga si Ricky Casaljay, waray trabaho, residente san Barangay Hamorawon.
Guin tutuohan nga miyembro san Magbutay Criminal Gang an suspek ngan Wahingon Group.
Sumala pa san impormasyon nga si Casaljay in naatubang san kaso kasumpay san nahitabo nga Victory Ambush nga nahitabo pira na kabulan an naglabay.
Subay san police report, nagdumara entrapment operations an composite nga mga grupo san kapulisan pasado alas 11:30 sa udto san Huwebes, September 7, 2023 kontra kan Casaljay sa Barangay Bagacay san nasabi nga ciudad.
Nahimo nga makapalit kan Casaljay an “poseur buyer” san usa nga 9mm caliber pistol sa kantidad nga 5 mil pesos.
Sumala ka san report, nakahalata an suspek nga pulis an iya katransaksiyon para humugot ini san pusil ngan guin pabuthan an mga otoridad rason para bumuwelta san putok an mga otoridad rason para mapatay an suspek.
Dayon nga gindara hi Casaljay ha Ospital para kunta matambal, kundi gindeklarar ine nga dead-on-arrival.
(With Reports and Photo from Rommel Rutor)
