MAHIGIT apatnapu’t walunlibong pamilya mula sa apat na lalawigan sa Eastern Visayas ang inilista bilang mga benepisyaryo ng Walang Gutom 2027 o Food Stamp Program ng Department of Social Welfare and Development.
Sinabi ni DSWD Regional Director Grace Subong na ang mga beneficiary ng programa na magsisimula sa Hulyo ay nagmula sa apatnapung mga bayan at tatlong lungsod sa Leyte; dalawampu’t isang bayan at isang lungsod sa Eastern Samar; dalawampu’t apat na bayan at dalawang lungsod sa Samar; at dalawampu’t apat na bayan mula sa Northern Samar.
Karamihan sa target beneficiaries ay mula sa Leyte na nasa 23,312; sumunod ang Samar, 12,258; Eastern Samar, 7,618; at Northern Samar na may 5,073.
Inihayag ni Subong na nasa proseso na sila ng validation sa lahat ng 115 Local Government Units sa buong rehiyon at pagkatapos nito ay magbibigay na sila ng card sa mga benepisyaryo.
Bawat pamilya ay makatatanggap ng 3,000 pesos kada buwan sa pamamagitan ng Electronic Benefit Transfer (EBT) Card sa loob ng tatlong taon.
Ang halaga ng nasa card ay gagamitin sa pagbili ng carbohydrates na 1,500 pesos; protein na 900 pesos; at fats, oil, at iba pang dietary fibers na 600 pesos. Maaring gamitin ang card sa accredited o partner establishments ng DSWD, gaya ng kadiwa stores, community-based organizations, at retailers.
