Tinawag ng National Bureau of Investigation (NBI) na “alarming” ang nangyaring bomb threat sa mga ahensya ng pamahalaan.
Bunsod nito ay nanawagan si NBI Director Medardo de Lemos sa publiko na maging mapagmatyag at i-report sa mga otoridad ang anumang kaduda-dudang aktibidad o impormasyon na may kaugnayan sa naturang kaso.
Binigyang diin ng NBI at ng Department of Justice na siniseryoso nila ang bomb threats at tutugunan nila ito, alinsunod sa itinatakda ng batas.
Nakikipag-ugnayan na ang NBI sa Japan Police Attaché at sa iba pang law enforcement agencies para pag-aralan ang bomb threat na ipinadala ng isang Takahiro Karasawa, kahapon.
Nabatid na dati nang naugnay si Karasawa sa bomb threats sa iba’t ibang bansa.
Ito rin umano ang nasa likod ng bomb threat sa MRT noong Sept. 8, 2023.
