APAT na menor de edad ang nasawi habang tatlong iba pa ang nasugatan makaraang tamaan ng natumbang puno, sa bayan ng Malabang, sa Lanao del Sur.
Ayon sa Bangsamoro Ministry of Social Services and Development (MSSD), nabuwal ang puno bunsod ng masamang panahon.
Ang mga nasawi ay pito hanggang labinlimang taong gulang habang ang tatlo pang nasugatang menor de edad ay nananatili pa sa ospital.
Nakapagbigay na ang MSSD ng tulong, gaya ng food packs sa mga pamilya ng mga biktima. Tiniyak din ng ahensya na magbibigay sila ng burial assistance sa mga pamilya ng mga nasawi at financial aid sa mga sumasailalim sa gamutan.
