TATLO katao ang nasawi habang apat na iba pa ang nasugatan matapos sumiklab ang sunog sa isang residential area sa Tondo, Maynila.
Ayon sa Bureau of Fire Protection – National Capital Region (BFP-NCR), nangyari ang sunog sa kahabaan ng Coral Street sa Barangay 58.
Lahat ng mga nasawi ay pawang mga residente habang tatlo sa mga nasugatan ay Fire Volunteers.
Nasa limampu’t apat na indibidwal o labing walong pamilya ang naapektuhan ng sunog.
Anim na kabahayan ang natupok habang tinaya sa walong daanlibong piso ang halaga ng mga natupok na ari-arian.
