Nakatakdang ilunsad ng Philippine Space Agency (PhilSA) ang MULA o Multispectral Unit for Land Assessment, ang pinaka-advanced na Earth observation satellite ng bansa, sa 2026. Target nitong makatulong sa mas maagang pagtukoy at pag-monitor ng mga bagyo, pati na rin sa agrikultura, disaster response, at pangangalaga sa kalikasan.
Ayon sa PhilSA, ang MULA ay may high-resolution multispectral camera na kayang kumuha ng detalyadong imahe ng kalupaan at karagatan. Sa pamamagitan nito, mas mabilis na makikita kung gaano kalawak ang pinsala ng bagyo, kung anong mga lugar ang apektado ng baha o tagtuyot, at pati na rin ang kondisyon ng mga pananim.
Magiging malaking tulong din ito para sa mga ahensya gaya ng PAGASA, NAMRIA, at lokal na pamahalaan para mas maging accurate ang datos na ginagamit sa pagdedesisyon, lalo na tuwing may kalamidad. Ang satellite ay ilulunsad sa low Earth orbit at regular na dadaan sa Pilipinas para makapagbigay ng updated na larawan.
