SUMAMPA sa panibagong record-high ang rice tariff collections sa bansa sa unang sampung buwan ng 2024.
Sa preliminary data mula sa Bureau of Customs (BOC), umakyat sa 30.095 billion pesos ang kabuuang taripa na nakolekta mula sa 3.86 million metric tons ng imported na bigas hanggang noong katapusan ng Oktubre.
Mas mataas ito ng 5.21 percent kumpara sa 28.604 billion pesos na nakolektang rice tariff simula Enero hanggang Oktubre ng nakaraang taon.
Nalagpasan din nito ang 29.93 billion pesos na nakolektang taripa sa bigas para sa buong taon ng 2023.
Ang lumobong rice tariff collections ay bunsod ng tumaas na volume ng imports, pagtamlay ng piso kontra dolyar at mas magandang shipment valuation ng customs sa kabila ng ibinabang taripa na 15 percent noong Hulyo.
