Malilikayan an grabe nga sakit kun temprano nga magpapakonsulta.
Ine an gintagan hin doon ni Asisclo Militante, Field Operations Division Chief han PhilHealth durante han ginbuhat nga Kapihan sa Bagong Pilipinas.
Sumala kan Militante, may-ada PhilHealth KONSULTA program para proteheran ha makamaratay nga sakit an katawhan.
Ha KONSULTA program, kantidad P1,700 an naka-alotaga kada pasyente para consultation, screening and assessment, laboratory and diagnostic tests, ngan para medisina.
Kundi gin-aghat ni Militante an publiko nga magpa rehistro ha PhilHealth KONSULTA Package agud makatagamtam han primary ngan outpatient health care services han mga accredited health facilities.
An mga Rural Health Units in usa han mga lugar diin pwede magpakonsulta ngan makatagamtam han mga benipisyo nga hatag han PhilHealth.
Dinhe ha Region 8, may-ada na 1.6 million nga mga registered beneficiaries nga nakatagamtam han KONSULTA Package Program han PhilHealth.
