UMABOT sa finals pero kinapos sa podium ang tatlong Filipina Swimmers sa 19th asian Games na ginaganap sa Hangzhou, China.
Nag-qualify si Xiandi Chua para sa finals ng women’s 200-meter individual medley habang sina Tiea Salvino at Kayla Sanchez ay nakapasok sa final ng women’s 50-meter backstroke.
Si Sanchez na nanalo ng Silver at Bronze sa ilalim ng team Canada sa Tokyo Olympics bago lumipat noong nakaraang taon, ay nagtapos sa ika-anim na pwesto sa time na 28.66 seconds.
Si Salvino naman ay pang-walo sa time 28.79 seconds habang si Chua ay pang-walo rin sa kanyang event.
Noong linggo ay pumang-lima sina Chua, Salvino, Chloe Isleta at Jasmine Alkhaldi sa women’s 4×100-meter freestyle relay.
Umaasa ang bansa na matutuldukan na ang dalawampu’t limang taong walang nasusungkit na medalya sa swimming sa Asian Games.