Gintatalinguha san National Bureau of Investigation o’ NBI Regional Office-Eastern Visayas nga ma-serbisyuhan an mas damo nga nga molupyo ipinaagi san pag-abre sin mga satellite offices sa magkalain-lain nga parte san rehiyon.
Durante san Kapihan sa Bagong Pilipinas, iginpahayag ni NBI Regional Director, Atty. Emeterio Dongallo, Jr. nga pag-aabrehan an mga satellite offices sa Catarman, Northern Samar ngan Naval, Biliran temprano sunod nga tuig.
Ine in dugang san mga satellite offices sa Ormoc City; Calbayog City; Maasin City; Sogod, Southern Leyte; Dolores ngan Balangkayan, Eastern Samar.
Ginpahayag pa ni Director Dongallo nga ine nga mga satellite offices in andam maghatag sin magkadurudilain nga serbisyo san NBI sugad san intelligence, forensic, investigation, ngan legal services.
Abre gihapon an regional office sa Tacloban City ngan an district office sine sa Catbalogan City, Samar para san ira mga serbisyo.
