Maabot ngada san 141 mil nga registrado nga mga botante dinhi sa siyudad san Calbayog an iginlala-uman nga mabotos yana nga adlaw para san Brgy ngan Sangguniang Kabataan Elections.
Sumala san mga datos nga nakuha san Infinite Radio Calbayog News tikang sa City Election Office, maabot ngada san 6,326 nga aada sa pangidaron nga tikang 15 ngadto sa 17 anyos an mabotos para san Sangguniang Kabataan.
Sira an makarawat san tag usa la nga balota para san SK. Maabot naman ngada sa 52,641 nga botante nga aada sa pangidaron nga tikang 18 ngadto 30 anyos an mabotos para san SK ngan Regular Brgy. Officials, sanglit makarawat sira san duha nga balota, an para sa SK ngan para sa Barangay.
Samtang adton Brgy. Officials la an pag bobotosan o na edad tikang 31 anyos tipa igbaw an naabot naman ngada sa 82,036 nga mga registered voters.
Sumala pa san nasabi nga mga datos, maabot ngada sa 276 an official candidates para san posisyon nga punong barangay, 2,051 naman an kandidato pagka kagawad san Barangay o Sangguniang barangay, 267 an kandidato pagka SK Chairperson, ngan 1,569 naman bilang SK Kagawad.
Tikang sini nga kadamuon san mga kandidato pag pipilion an 157 nga Punong Barangay, 157 gihapon nga SK Chairpersons, ngan tag pito nga miembro san Sangguniang barangay ngan sangguniang kabataan sa kada Barangay.
An siyudad san Calbayog nga may 157 nga mga barangay an may-ada 154 nga Voting Centers, 823 nga voting precint ngan 436 nga clustered precints.
Tikang sini nga 157 nga posisyon para san Punong Barangay, 50 nga mga barangay an un opposed o waray kakontra nga kandidato, 13 nga mga barangay an tag 3 an kandidato, trese gihapon an puro kababayen-an an kandidato,ngan 42 nga mga barangay an eguales an gender, or tag-usa nga lalaki ngan babaye an kandidato sa posisyon la gihapon san Punong Barangay.
Duha naman nga mga barangay – an Pilar sa distrito san Oquendo ngan Binaliw, sa distrito san Tinambacan, an mag bugto an magka kontra para san nasabi nga posisyon.
/Eleen Lim
