MARARANASAN pa rin sa bansa ang mataas na heat index sa kabila nang nagtapos na ang tag-init at opisyal nang nagsimula ang tag-ulan.
Sa Bagong Pilipinas Ngayon public briefing, sinabi ni PAGASA Deputy Administrator for Research and Development Dr. Marcelino Villafuerte II na may mga lugar ang magkakaroon pa rin ng mainit na panahon, kabilang ang Eastern Section ng Visayas, Mindanao, at maging sa ilang bahagi ng Metro Manila.
Ang pinakamatinding bugso ng mainit na panahon ay mararanasan bandang alas dos o alas tres ng hapon, na magdudulot naman ng pamumuo ng kaulapan at magreresulta ng mga pag-ulan dakong alas singko ng hapon hanggang alas sais ng gabi.
Bunsod nito, patuloy na pinapayuhan ang publiko na uminom pa rin ng maraming tubig.