INAASAHAN ng Philippine Army ang tulong ng dalawampu’t dalawang dating rebelde na sumuko kamakailan upang kumbinsihin ang mga natitirang miyembro ng New People’s Army (NPA) na nag-o-operate sa Samar at Eastern Samar na magbalik-loob na sa pamahalaan.
Sa pulong, kahapon, sa Barangay Locso-on sa Borongan City, sa Eastern Samar, sinabi ni Brig. Gen. Noel Vestuir na magsisilbi ang mga dating miyembro ng Sub-Regional Committee Apoy Platoon ng NPA para kumbinsihing sumama sa kanila ang labing anim pang natitirang mga rebelde.
Inaasahan na mahihikayat ng mga dating rebelde ang kanilang mga dating kasamahan na aktibo pa ring nakikipaglaban sa pamahalaan sa pamamagitan ng mga sulat at video message.
Nabatid na ang mga dating Apoy Platoon members ay sumuko sa pagitan ng September 2023 hanggang May 2024.
