NAGPOSITIBO sa red tide ang seawater samples na nakolekta mula sa Calbayog City, Daram Island, Zumarraga Island, at Maqueda Bay sa Jiabong, Motiong, Paranas, San Sebastian, Calbiga, Pinabacdao, at Hinabangan sa Samar.
Kasunod ito ng laboratory examination na isinagawa ng Bureau of Fisheries and Aquatic Resources (BFAR) 8 – Provincial Marine Biotoxin Laboratory sa Catbalogan City.
Bunsod nito, naglabas ang BFAR 8 ng Local Red Tide Warning sa naturang mga lugar.
Samantala, nananatiling epektibo ang kaparehong babala para sa Cambatutay Bay sa Tarangan, Samar; Irong-Irong Bay sa Catbalogan City; Matarinao Bay sa Eastern Samar, partikular sa general Macarthur, Quinapondan, Hernani, at Salcedo; at katubigan ng Guiuan, Eastern Samar.
Upang matiyak ang kaligtasan ng publiko, lalo na ang mga naninirahan malapit sa mga naturang lugar, ipinagbabawal ang paghango, pagbebenta, at pagkain ng lahat ng uri ng shellfish, gaya ng tahong at talaba at alamang mula sa mga nabanggit na katubigan.
