NAIUWI nina Kathryn Bernardo, Piolo Pascual, at Alfred Vargas ang pinakamatataas na parangal habang nasungkit ng “Mallari” ang Best Picture sa 72nd Filipino Academy of Movie Arts and Sciences (FAMAS), na ginanap sa Manila Hotel, kagabi.
Napanalunan ni Kathryn ang kanyang kauna-unahang FAMAS Best Actress Award, sa mahusay na pagganap sa pelikulang “A Very Good Girl,” habang sina Piolo at Alfred ay nag-tie sa best actor para sa kani-kanilang pelikula na “Mallari” at “Pieta.”
Itinanghal naman ang Roderick Cabrido-Helmed na “Mallari” bilang biggest winner ng star-studded event, matapos humakot ng kabuuang pitong awards.
Kabilang sa iba pang nagwagi ay sina Louie Ignacio bilang Best Director para sa “Papa Mascot”; Gloria Diaz, Best Supporting Actress para sa “Mallari”; L.A. Santos, Best Supporting Actor para sa “In His Mother’s Eyes”; Euwenn Mikaell, Best Child Actor para sa “Firefly”; at Elia Ilano, Best Child Actress para sa “Ghost Tales.”
