ITINANGGI ng Independent Commission for Infrastructure na inimbitahan na si Senator Bong Go para humarap sa imbestigasyon bilang resource person sa Flood Control Scandal.
Ayon kay ICI Spokesperson Brian Hosaka, sa ngayon ay wala pang ipinadadalang imbitasyon kay Go.
Sa kaniyang post sa Facebook, sinabi ni Dating Senador Antonio Trillanes IV na may natanggap syang impormasyon na inimbitahan na ng ICI si Go subalit ayaw umano nitong humarap sa komisyon.
Magugunitang isinumite ni Trillanes ang kopya ng kaniyang reklamong Plunder at Graft laban kay Go at kay Dating Pangulong Rodrigo Duterte.
Ang reklamo ay may kaugnayan sa 7 billion pesos na halaga ng Government Infrastructure Projects na nai-award sa kumpanyang pag-aari ng ama at kapatid ni Go.




