INANUNSYO ng Israeli Defense Forces na walong sundalo nila ang nasawi sa Southern Gaza, sa isa sa pinakamadugong insidente sa kanilang tropa mula noong Oct. 7 matapos sumalakay ang grupong hamas sa Israel.
Sa preliminary findings, pinasabugan ang armored vehicle na may lulang mga sundalo na bahagi ng convoy, sa Northwestern Part ng Tal Al-Sultan.
Sinabi ni IDF Spokesperson Daniel Hagari na batay sa nakalap nilang impormasyon, sumambulat umano ang isa sa engineering vehicles sa convoy bunsod ng explosive devices na nakatanim sa lugar.
Idinagdag ng Israeli Military na matindi ang naging pinsala ng pagsabog at mahirap nang tukuyin ang pagkakakilanlan at matagpuan ang mga katawan ng mga sundalong nasawi.
