Isiniwalat ni Finance Secretary Ralph Recto ang posibilidad na ibenta sa Social Security System (SSS) at Government Service Insurance System (GSIS) ang stake o sapi ng gobyerno sa Subic-Clark-Tarlac Expressway (SCTEX) upang palakasin ang investment portfolio ng pension funds.
Ginawa ni Recto ang pahayag isang linggo matapos sabihin ng Bases Conversion and Development Authority (BCDA) na ikinu-konsidera nilang ibenta ang natitirang stake sa SCTEX sa MVP Group na pinamumunuan ng tycoon na si Manuel V. Pangilinan.
Sinabi ng kalihim na mas mainam kung bibilhin ng SSS at GSIS ang shares para kumita sila ng pera.
Ang SCTEX ay 94-kilometer expressway na tumatawid sa Bataan, Pampanga, at Tarlac.
Ang kontrata sa pangangasiwa, pag-o-operate, at pagma-mantina ng proyekto ay inaward sa NLEX Corp. ng BCDA noong Oct. 2015.
