NAG-release ang Department of Social Welfare and Development (DSWD) ng 31.59 million pesos sa mahihirap na pamilya sa Eastern Visayas para sa programa na idinisenyo upang mabawasan ang epekto ng kagutuman at kakulangan ng tubig.
Ang naturang halaga ay pinakinabangan ng 3,900 individuals na naging bahagi ng pagsasanay at pagta-trabaho sa Northern Samar, Eastern Samar, at Southern Leyte, sa ilalim ng Project LAWA o Local Adaptation to Water Access at BINHI o Breaking Insufficiency through Nutritious Harvest for the Impoverished.
Ayon kay DSWD Eastern Visayas Information Officer Jonalyndie Chua, bawat isang benepisyaryo ay tumanggap ng 7,500 pesos sa Payout Activities sa iba’t ibang petsa, simula Enero hanggang Hunyo.
Saklaw nito ang mga bayan ng Almagro, Matuguinao, Sta. Margarita, Catbalogan City, Sta. Rita, Villareal, at San Jose De Buan sa Samar; Catubig, Gamay, Lapinig, Silvino Lubos, at Lope De Vega sa Northern Samar; Oras, Dolores, Jipapad, San Policarpo, at Maslog in Eastern Samar; at San Ricardo, Bontoc, Silago, Sogod, at Libagon sa Southern Leyte.