PATAY ang isang Chinese National na miyembro ng kidnap gang matapos magbaril sa sarili habang inaaresto ng mga otoridad sa Pampanga.
Ayon sa Bureau of Immigration (BI), nangyari ang insidente sa loob ng condominium building sa Angeles City.
Sinalakay ng mga tauhan ng Fugitive Search Unit ng BI ang lugar para arestuhin ang tatlong dayuhang suspek dahil sa paglabag sa Philippine Immigration Laws.
Pero sa halip na sumuko, tumakas ang mga dayuhan kaya nauwi pa sa habulan ang operasyon.
Nadakip ng mga otoridad ang tatlo sa mga Chinese suspects habang ang isa naman ay dead on the spot makaraaang magbaril sa sarili.
Ayon kay BI Commissioner Norman Tansingco, ang mga naturang Chinese nationals ay pangunahing suspek sa kasong pagpatay sa siyam na dayuhan na ang mga bangkay ay itinapon sa iba’t ibang lugar sa Pampanga.
Anim sa mga biktima ng pagpatay ay pawang Chinese nationals habang ang tatlo ay mula sa Vietnam, Malaysia at Japan.
