Komo baton san epekto san naglabay nga Bagyo Kristine, igin-anunsyo san Pag-IBIG Fund an pag-abre san ira Calamity Loan Program ngan moratorium sa pagbayad san Housing Loan san mga apektado nga mga miyembro dinhe sa Eastern Visayas.
Ha ginubuhat nga Kapihan sa Bagong Pilipinas, iginpahayag ni Alectys Bajarias, Pag-IBIG Fund Acting Area Head for North Central & Eastern Visayas, nga an mga miyembro nga naukoy o’ nagtatrabaho sa mga lugar nga igin-pailarom sa State of Calamity in puydi mag-apply sin Calamity Loan ngan usa ka bulan nga moratorium sa pagbayad san Housing Loan agud mabuligan nga matalwas sa krisis.
An Region 8, ilabi na ang mga gin-deklara nga State of Calamity nga mga siudad ngan munisipyo sa Northern Samar ngan Eastern Samar in puydi mag-apply san Calamity Loan—usa nga programa nga gin-desinyo para maibanan an gin-aabaga nga kakurian mahitungod san naglabay nga kalamidad.
An kwalipikado nga miyembro in puydi humuram kutob 80 porsiento san iya kabug-usan nga Pag-IBIG Regular Savings. Ine in may-ada himubo nga 5.95% nga interes kada tuig ngan puydi bayaran sa sakob sin duha ngada tulo ka tuig.
Samtang, para naman san usa ka bulan nga Housing Loan payment moratorium, iginsumat ni Bajarias nga an pagbayad in puydi lat-angan nga waray dugang nga baraydan.
Igindugang pa ni Bajarias nga an mga kwalipikado nga mga miyembro in puydi mag-apply kutob Disyembre 31, 2024 ipinaagi sa Virtual Pag-IBIG o’ diri ngani sa pinakahirani nga Pag-IBIG Branch ngan satellite offices.
