Nagpalabas ng arrest order ang senado laban kay Kingdom of Jesus Christ (KOJC) leader Apollo Quiboloy dahil sa patuloy na pag-isnab sa pagdinig ng Senate Committee on Women, Children, Family Relations and Gender Equality.
Nilagdaan nina Senate President Juan Miguel Zubiri at Sen. Risa Hontiveros ang arrest order, kahapon, March 19.
Inatasan ng senado ang senate sergeant-at-arms na ipatupad ang arrest order.
Una ng nagsumite ng tugon si Quiboloy sa pamamagitan ng kaniyang abogado sa inilabas na show cause order ng komite.
Gayunman, ayon kay Hontiveros walang merito ang paliwanag ni Quiboloy sa kaniyang isinumiteng kasagutan
Ayon kay Zubiri, ang paglagda sa arrest order ay bilang pagprotekta sa committee system ng mataas na kapulungan.
Kung si Quiboloy ay kusang sisipot sa susunod na pagdinig, sinabi ni Zubiri na hindi na kailangan na siya ay dakpin.
