MAGHAHAIN ng panibagong diplomatic protest ang pilipinas laban sa China bunsod ng pinakahuling pangha-harass na nangyari sa Bajo De Masinloc at Escoda Shoal sa West Philippine Sea.
Kinumpirma ni Foreign Affairs Secretary Enrique Manalo ang pagsusumite ng protesta ng bansa, kasabay ng pagbibigay diin, na napakalinaw na nasa loob ng Philippine Exclusive Economic Zone ang mga barko ng Pilipinas.
Sinabi pa ng kalihim na hindi niya maintindihan kung bakit paulit-ulit na lamang ang China sa pangha-harass, gayung malinaw na iligal ang kanilang mga ginagawa.
Noong Miyerkules ay iniulat ng Philippine Coast Guard na binomba ng tubig ng China Coast Guard (CCG) at binangga ang barko ng Bureau of Fisheries and Aquatic Resources (BFAR) na nagpa-patrolya sa bisinidad ng Bajo De Masinloc.
Noong weekend naman ay nagsagawa rin ang CCG ng dangerous maneuvers laban sa PCG vessels sa bisinidad ng Escoda Shoal habang patungo ang BRP Cape Engaño at BRP Melchora Aquino sa Rozul Reef para tulungan ang mga Pilipinong mangingisda na nauna nang hinarass ng mga tsino.
