TINIYAK ng bagong talagang general manager ng Metro Rail Transit line 3 (MRT-3) na si Michael Jose Capati na wala silang planong magtaas ng pasahe, sa ngayon.
Ginawa ni Capati ang pagtiyak sa gitna ng ipinatupad na taas-pasahe sa Light Rail Transit line 1 (LRT-1), simula ngayong Miyerkules, April 2, kasunod ng pag-apruba sa Revised Fare Matrix.
Bumalik si Capati bilang MRT-3 chief matapos masibak sa pwesto ang pinalitan nitong si Oscar Bongon noong Marso dahil sa pagpalya ng escalator sa Taft Avenue Station na ikinasugat ng sampu katao.
Dati nang hinawakan ni Capati ang kaparehong posisyon noong 2022 matapos magsilbi bilang Director for Operations ng MRT-3 sa loob ng limang taon.
Ayon sa opisyal, nais niyang maibalik ang tiwala ng mga pasahero ng MRT-3, kasunod ng sunod-sunod na mga isyu sa transport system sa mga nakalipas na linggo.
