MULING pinagtibay ni Pangulong Ferdinand Marcos Jr. ang commitment ng kanyang administrasyon na gawing moderno ang mga pantalan sa bansa para sumigla ang ekonomiya at turismo sa mga rehiyon.
Ginawa ni Pangulong Marcos ang pahayag nang pangunahan nito ang inagurasyon sa pinalawak na Balingoan Port sa Misamis Oriental.
Sa kanyang talumpati, binigyang diin ni Marcos ang kahalagahan ng pag-upgrade sa Balingoan Port para sa regional development.
Aniya, inaasahan ang paglakas ng turismo, pagbuhos ng negosyo, paglago ng ekonomiya, at higit sa lahat ay mas gaganda ang kabuhayan ng mga taga-Misamis Oriental.
Ilan sa iba pang malalaking proyekto ay ang Currimao Port Expansion sa Ilocos Norte, New Cebu International Container Port, Ormoc Port Expansion sa Leyte, at Plaridel Port Improvement sa Misamis Occidental.
