Gintututukan san Department of Education o’ DepEd nga mapudngan an naghihinitaas nga ihap san mga estudyante nga nag-buburod.
Sa ginbuhat nga Kapihan sa Bagong Pilipinas, iginpahayag ni DepEd Regional Director Evelyn Fetalvero nga iginpapatuman san ira ahensiya an Comprehensive Sexuality Education o’ CSE kun diin iginlalakip sa pagtutdo an adolescent sexuality and reproductive health ilabi na sa mga subjects sugad san Science, Values Education, ngan Social Studies.
Sumala pa kan Director Fetalvero, an pagtutdo san CSE in age and development appropriate o’ subay san edad ngan an kapas san estudyante nga maka-intindi san leksyon parte sa sexuality.
Igindugang pa ni Fetalvero nga iginpapailarom sa pag hag-id an magturutdo nga magkakapot san CSE agud magin epektibo ine sa ira pagtutdo.
Gintagan sin duon ni Fetalvero nga an teenage pregnancy in diri la problema san DepEd kundi san magkalain-lain nga ahensiya san gobyerno ngan mga sektor sa komunidad. Nanawagan an opisyal nga magburublig an mga nahitutungdan nga ahensiya, lakip na an mga kag-anak nga mapudngan an paghinitaas san ihap san mga batan-on nga nagbuburod.
