P30K per family, ibibigay ng Office of the President sa mga nasunugan sa Parola; DSWD, magbibigay din ng P10K

MAGBIBIGAY ng 30,000 pesos ang Office of the President sa bawat pamilyang nasunugan sa Parola Compound sa Binondo, Maynila.

Ayon kay Palace Press Officer Claire Castro, makikipag-ugnayan ang OP sa Manila City LGU para sa mabilis na proseso ng pamamahagi ng tulong-pinansyal.

Dagdag pa ito sa 10,000 pesos na naipamigay na ng DSWD sa ilalim ng kanilang AICS Program.

Maliban sa nasabing mga tulong, pinakilos na rin ng Malakanyang ang Department of Health para tiyaking nababantayan ang kalusugan ng mga naapektuhang pamilya.

Ayon sa DOH, namahagi na ng mga gamot, bitamina at hygiene kits sa mga residenteng pansamantalang namamalagi sa evacuation centers.

Samantala, inumpisahan na ng DSWD ang pamamahagi ng tulong-pinansyal sa mga pamilyang naapektuhan ng sunog sa Parola Compound, Binondo, Maynila.