Tungod san nakakaalarma nga kaso san suicide sa Sinirangan Bisayas, nagkamay-ada san Online Orientation on Mental Health and Suicide Prevention an Department of Health – Eastern Visayas Center for Health Development sadton Lunes nga adlaw. Ini an gin-atinderan san porlomenus 300 nga representatante san magkalian nga ahensiya san gobyerno ug pribado nga sektor sugad san mamamahay o media.
Iginreport san DOH –EVCHD an mga nakita nga hinungdan san suicide sugad san problema sa pamilya ug relasyon, trabaho o kita, edukasyon, seguridad, sakit ug iba pa. Nakita nga sa kada napulo nga estudyante, mayda usa an naghuhunahuna san suicide, samtang sa kada 5 nga estudyante, 1 an mayda suicide attempt.
Base sa record san National Center for Mental Health (NCMH), porlomenus 12mil nga tawag an nakakarawat san crisis hotline , ug masobra 4 mil an suicide related sa bulan san Agosto tuig 2021.
Nagsagdon an DOH-EVCHD nga kun mayda nakita nga mga senyales san pag-unay an usa nga indibidwal, diri ini angay bayaan nga nag-uusahan; ihirayo an hinagiban, o armas de fuego, makahurubog nga irimnon, o droga nga pwede magamit san iya pag-unay. Dad-on siya sa emergency room san usa nga ospital, o magkonsulta san eksperto nga mental health professional.
Usa nga panuyo san nasabi nga online orientation an paggiya san pipira nga mamamahag bahin san tama ug responsible nga pagreport san kaso san pag-unay, diin gintagan duon an tama nga pagpresentar sa publiko nga nagkokonsidera san magigin epekto ngadto san pamilya san biktima. An istorya nga mayda paglaum, karig-on ngan pagbangon.
Gin-aghat san DOH-EVCHD nga mahibaro pag “self-regulate” an mamamahayag o media organizations bahin san tama ug responsable nga pagreport san kaso san suicide sugad san diri pagbutang personal ngan sensitibo nga impormasyon sugad san ngaran, imahe, ngan suspected notes san biktima, an pamaagi san pag-unay ngan lugar kun diin nahinabo. Igkonsidera manta an tama nga pamatasan sa pakighimnagraw sa pamilya, ngan an pagrespeto san pribado nga isyu. Labaw san ngatanan, igindidiri an pagpasamwak san impormasyon kun waray kumpirmasyon tikang san tinubyanan san balaud.
