NAILAGAK na sa kanyang huling hantungan ang Superstar at National Artist for Film and Broadcast na si Nora Aunor, na may full military honors, sa Libingan ng mga Bayani, sa Taguig City, kahapon.
Nilatagan ng watawat ng Pilipinas ang kabaong ni Aunor, at ineskortan ng mga tauhan ng Armed Forces of the Philippines sa departure honor na sinundan ng funeral march mula sa gate ng libingan hanggang sa paglalagakan ng kanyang labi.
Pagkatapos ng last viewing ay isinagawa ang final honor sa pamamagitan ng 21-gun salute habang ibinababa ang kabaong ng Superstar sa lupa.
Bago ang libing ay nagsagawa muna ng necrological service sa Metropolitan Theater sa Maynila, kung saan nagbigay ng eulogies ang kapwa National Artist na si Ricky Lee at Actor-Director Joel Lamangan.
Pumanaw si Nora noong April 16 sa edad na 71, bunsod ng acute respiratory failure.
