UMABOT na sa 5,244 an mga nag-avail sa voter registration sa buhatan san COMELEC Calbayog as of June 18, 2024.
Ini in sumala kan Election Assistant II Leizel O. Dadul nga usa san mga naatubang san mga aplikante para san voter registration.
Sumala pa kan Dadul, kun diri naman makakabisita sa ira opisina, pwede man liwat magpa rehistro online pinaagi san Facebook page san COMELEC Calbayog, pero tubtob nala sa August 30, 2024.
Samtang, iguin pahinumdom naman ni Election Assistant II Maria Jesusita Z. Briones, nga sa September 30, 2024 na an deadline san pagparehistro.
Adton mga waray na makabutos sa sulod san duha nga naglabay nga mga election, guin aaghat kamo nga magpa reactivate sa COMELEC Calbayog.
Para naman san mga guin kasal o nagbag-o na apilyedo, kinahanglan liwat niyo magpa update sa buhatan san poll body.
Samtang, sa Oct 1-8 naman an filing san Certificate of Candidacy para san mga tigsiring para sa election sa May 2025.
