KATORSE nga mga kabatan-unan nga scholars san Organiko nga pag-uma o Organic Youth Scholars an naghuman san ira 9 ka bulan nga internship an kakulop nga adlaw.
Sa iginbuhat nga Regional Organic Agriculture Congress dinhi sa siyudad san Calbayog an kakulop nga adlaw, kinarawat san ira sertifiko san pagtatapos san internship an nasabi nga mga youth.
Nakomponer san siyahan nga batch san scholars dinhi sa rehiyon otso mao an nagtitikang sa mga munisipyo san Leyte ngan Southern Leyte, Lawaan sa Eastern Samar, Gandara ngan Sta. Margarita dinhi sa Samar, ngan Catubig sa Northern Samar.
Sira an nagpailarum san pag aram kabahin san Organiko nga pamaagi san pag uma sa sulod san siyam ka bulan sa magkalain nga partner organic farming communities dinhi sa Eastern Visayas.
Durante san internship, kinarawat an mga scholars san binulan nga stipend nga nakantidad sin tag 5 mil pesos an kada bulan, samtang an ira farm partner diin sira nag intern an makarawat san tag 5 mil ka pesos kada intern sa sulod san 21 ka bulan. Ngan yana nga mahihimo na sira magtikang san ira gin huhuna-hunaan nga livelihood project gamit an organic farming method, utro nga makawarat an mga OA Youth Scholars san lain nga 150 mil ka pesos bilang start-up capital, ngan lain pa nga tig diyes mil ka pesos sa kada bulan sa sulod san usa ka tuig nga ayuda, mientras nga dire pa nakita an ira proyekto.
Samtang durante gihapon san siyahan nga adlaw san congress kakulop, igin presenter an pipira nga success stories san organiko nga pag uma dinhi sa Eastern Visayas.
Nag presenter kabahin san Fruit Tree Management si Benjamen Mahinay, Jr. tag-iya san Sonry
Farm sa Alang-alang Leyte, Certified Swine Production si Mr. Dennis Martin, tag-iya san D Martin Integrated Farm san Casab-ahan, Gandara, ngan Organic cacao farming naman si Mr. Osmena Tajo, Manager san Apoy Benit Cacao Agricultural Farming sa Brgy. Dagum dinhi sa Calbayog.
