NAGLABAS ang provincial government ng Northern Samar ng executive order para higpitan ang pagbiyahe ng mga baboy at pork products sa tatlong bayan sa loob ng isang buwan upang mapigilan ang paglaganap ng African Swine Fever (ASF).
Nakasaad din sa E.O. No. 25-02-01 na nilagdaan ni Governor Edwin Ongchuan, dapat maglatag ng quarantine checkpoints sa boundaries ng Las Navas, Catubig, at Laoang.
Upang palakasin ang pagpapatupad ng E.O., binuhay ang provincial at municipal ASF task force, gayundin ang quarantine checkpoints, sa pamumuno ng provincial veterinary office.
Batay sa kopya ng kautusan na ibinahagi ng provincial government sa social media pages, papayagan lamang ang pag-transport ng mga buhay na baboy, fresh o frozen pork, at processed pork products kapag may proper documentation, kabilang ang veterinary health certificates at official receipts mula sa awtorisadong sellers.
