NAKIPAGSANIB pwersa ang Department of Social Welfare and Development (DSWD) sa mga paaralan sa Eastern Visayas para sa expanded Tara, Basa! Tutoring program.
Layunin nito na matulungan ang mga batang mag-aaral na hindi makabasa o hirap na makabasa, at mabigyan ng ayuda ang college students kapalit ng kanilang tutorial services.
Ayon kay DSWD Regional Information Officer Jonalyndie Chua, sa Tacloban City ay lumagda ang DSWD ng kasunduan sa Leyte Normal University (LNU) at Eastern Visayas State University (EVSU).
Aniya, sa pamamagitan ng programa, ang mga estudyante mula sa EVSU at LNU ay magsisilbing tutors ng mga batang mag-aaral.
Bilang kapalit ay pagkakalooban sila ng DSWD ng modified cash o educational assistance, na makatutulong sa kanila, gaya ng transportasyon, boarding, at iba pang gastusin sa kanilang pag-aaral.
Inihayag ng DSWD na naghahanap pa sila ng school partners sa Ormoc City.
