Naniniwala si dating Presidential Spokesperson Edwin Lacierda na humina ang Office of the Ombudsman noong panahon ni dating Ombudsman Samuel Martires.
Ayon kay Lacierda, baluktot kasi ang pag-unawa ni Martires sa tungkulin ng Ombudsman at naging tagapagtanggol ito ng mga opisyal ng gobyerno, sa halip na maging tagapagbantay ng taumbayan.
Positibo naman ang pagtingin ni Lacierda sa mga ginagawang hakbang ngayon ni Ombudsman Boying Remulla para maibalik ang dangal sa tanggapan.
Ayon sa dating presidential spokesperson, kung tunay ang layunin ni Remulla na tuparin ang diwa ng Konstitusyon, ito ay isang hakbang na dapat ikatuwa ng taumbayan.
Kung nasayang aniya ang mga taon noon sa Office of the Ombudsman, ngayon ay handa ang pamunuan nito na maging isang “Bantay Bayan” na handang harapin ang korapsyon.




