JUST IN | DUHA nga tindahan san karne o meatshop an guin isyuhan san show cause order san Local Price Coordinating Council (LPCC).
An nasabi nga show cause order in petsado May 26, 2025, adlaw san Lunes.
Ginhimo basehan san nasabi nga pitad san buhatan san LPCC nga guin papamunuan ni Mayor Raymund “Monmon” Uy kumo Chairman—an iguin paabot nga reklamo kun diin nakalakip an resibo san presyo san guin palit nga karne san baboy nga maabot san P450 an kantidad san kada kilo.
Iguin pahamtang dida san pagpatawag san LPCC san duha nga tindahan san karne dinhi sa ciudad san Calbayog, an posible nga pagtalapas san suggested retail price san DTI ngan LPCC subay san deklarasyon san ‘Price Freeze’ kasunod san “State of Emergency” nga iguin papatuman sa bug-os nga provicia san Samar, tungod san epekto san limitado nga pag-access sa San Juanico Bridge.
Tungod sini, guin tatagan san tulo ka adlaw an mga nadadabihan, kahuman nira makarawat an nasabi nga notice para mag-eksplikar kay kun anano diri sira angay pasakahan san kriminal nga kaso ngan bawion an ira business permit.
Sumala kan Atty. Agustin M. Avalon, City Legal Officer, waray la nira ipabanggit an ngaran san mga iguin rereklamo nga meat shop subay san due process.
