Nagpasaklolo ang Alkalde ng Allen, Northern Samar sa Philippine Coast Guard (PCG) hinggil sa barko na nakalubog ang kalahating bahagi sa nasasakupan nitong pantalan.
Tinukoy ni Mayor Joey Suan ang MV Reina Hosanna ng Montenegro Shipping Lines Inc. na sumadsad sa bayan ng Capul sa Northern Samar noon pang Feb. 11 ngayong taon bunsod ng pagpalya ng makina.
Noong May 13 ay hinatak ang barko at dinala sa Balwharteco Port sa Allen para sa salvage operation subalit na-diskubre ng sumunod na araw na lumubog ang kalahati nito matapos pumutok ang airbags na ginamit.
Nababahala ang alkalde na magdulot ito ng oil spill na maaring magdulot ng panganib sa kanilang marine resources at makaapekto sa kanilang mga mangingisda.
