SIYAM na indibidwal na nagpapanggap na mga taga-bangko para makapagnakaw ng pera mula sa credit card holders ang inaresto ng mga awtoridad sa Trece Martires at General Trias sa Cavite.
Ayon sa PNP Anti-Cybercrime Group, nagsimulang mag-operate ang sindikato noong 2021 at kumita na ng mahigit isandaang milyong piso sa pamamagitan ng voice phishing scam.
Sinabi ni PNP-ACG Cyber Response Unit Chief, Police Colonel Jay Guillermo, na modus ng grupo na tatawagan ang credit card holder, tatanungin ang pangalan saka bobolahin pero ang target ay ang One-Time Pin.
Narekober ng mga awtoridad ang piraso ng mga papel na may nakasulat na script na binabasa ng mga suspek habang kinakausap ang kanilang mga biktima.
Dati umanong nagta-trabaho sa call center ang mga dinakip kaya alam ng mga ito kung paano makipag-usap at makipag-deal sa mga nabibiktima nila, online.
